TURKIAKO SAKARYA PROIEKTUAREN 2A FASEKO EKOIZPEN-UNITATE FLOTATZAILEAK (FPU) AMPOREN PRESIO ALTUKO METAL-METAL BOLADUN BALBULAK IZANGO DITU

Turkiako energia proiektu estrategikoenetakoa den eta Sakarya gas eremuan kokatuko den Ekoizpen Unitate Flotatzailerako 110 boladun balbula baino gehiago hornitzeko AMPO hautatu du Turkiako Petrolio Korporazioak (TPAO).  Balbula hauek presio altuetarako izango dira eta asentu metalikoak izango dituzte. Proiektu hau Sakarya gas-eremuaren 2A izeneko garapen fasearen parte da eta ingeniaritza lanak Global Offshore Engineering (GOE) enpresaren esku daude.

Sakarya gas-eremua, lehen Tuna aurkikuntza izenez ezagutzen zena, Mendebaldeko Itsaso Beltzean dago, 3921 blokean, Turkiako Zonguldak hiritik 185 kilometro iparraldera. Momentu hauetan urtebeteko egokitze-fasean dago FPU unitatea Çanakkaleko ontziolan, Dardanelos itsasartean. Aurreikuspenen arabera, 2025eko hirugarren hiruhilekoan eramango da Filyosera, azken moduluak instalatu eta martxan jartzeko lanak burutzeko. Lehen gas-ekoizpena 2026ko hirugarren hiruhilekorako aurreikusten da.

Garapen estrategiko honen baitan, AMPO POYAM VALVESek 2025 eta 2026an 110 boladun balbula baino gehiago hornituko ditu, guztiak presio altukoak, on-off motakoak eta asentu metalikodunak, eragingailu pneumatikoekin hornituak. Balbulen tamainak 2 hazbetetik 20 hazbeterainokoak izango dira, eta 2500# arteko presio mailak jasango dituzte; horietako batzuk brida trinkodunak izango direlarik. Balbula hauek FPU egokituan instalatuko dira, presio altuko zerbitzu kritikoak kudeatzeko. Balbula guztiak DNV ziurtagiridunak izango dira, eta presio altuko probak gaindituko dituzte, eragingailuekin batera, upstream sektoreko baldintza zorrotzenetan errendimendu gorena bermatzeko. Prozesu osoan zehar, AMPO POYAM VALVESek lankidetza estua izan du GOE bezeoarekin, aholkularitza teknikoa eskainiz eta balbula motak zein material egokienak definitzen lagunduz, proiektu offshore honen behar bereziei erantzuteko.

AMPOren balbulek Barossa FPSO proiektuan izaten duten errendimendu bikaina giltzarria izan da Sakarya proiekturako aukeratua izateko, eta horrek AMPOren posizionamendua sendotu du mundu mailako konfiantzazko partner gisa, offshore aplikazio konplexuetan. Mugarri berri honek berriz ere erakusten du AMPOk zer-nolako esperientzia duen zerbitzu zorrotzetarako balio erantsi altuko balbula-soluzioetan, eta bere konpromisoa berresten du upstream industriari teknologia aurreratu eta fidagarriekin laguntzeko.