AMPOK MUNDUKO GNL PROIEKTU HANDIENETAKO BATEAN PARTE HARTU DU, 15.000 BALBULA INGURU HORNITUZ

Gaur egun eraikitzen ari diren munduko gas natural likidotuaren (GNL) esportaziorako terminal handienetako batean parte hartu du AMPOk:  Brownsvilleko portuan (Texas, AEB) kokatzen den eta 1.000 akre inguruko azalera duen Rio Grande LNG proiektuan, hain zuzen.

NextDecadek garatu eta Bechtel ingeniaritza-enpresa gauzatzen ari den proiektu hau mugarri garrantzitsua da gas natural likidotuaren esportaziorako azpiegitura globalen hedapenean. Amaitutakoan, instalazioak urtean 48 milioi tona inguruko (MTPA) likidotze-ahalmena izango du, zortzi GNL trenetan banatuta. Horrela, gaur egun munduan garatzen ari diren GNL esportaziorako terminal handienetako bat izango delarik.

Proiektu estrategiko honen baitan, AMPOri hainbat kontratu esleitu zaizkio eraikitzen ari diren lehen bost GNL trenetarako balio teknologiko handiko 15.000 balbula inguru hornitzeko. Horrek, gainera, kooperatibak GNLaren aplikazio kritikoetarako konfiantzazko bazkide gisa duen posizioa sendotzen du. Horniduraren barruan, instalazio hauetako lan-baldintza zorrotzak betetzeko bereziki diseinatutako balbula-teknologia ugari daude: 16” eta 1500 lbs arteko bola-, konporta-, globo- eta erretentzioko balbula kriogenikoak, eta bola-, konporta-, globo- eta erretentzioko balbula ez-kriogenikoak.

Proiektua aurreikusitako egutegiaren arabera doa aurrera, eta dagoeneko entregatu dira lehen, bigarren eta hirugarren trenetarako balbula gehienak. Laugarren treneko lehen balbulak 2026ko uztailaren erdialderako amaitzea aurreikusten da, eta bosgarren trenari dagozkion entregak 2027ko lehen hiruhilekoan hasiko dira. Balbulak fabrikatu eta hornitzeaz gain, AMPO SERVICE-ek zeregin aktiboa izan du proiektu osoan zehar, laguntza teknikoa eskainiz, instalazio-faseak arrakastaz gauzatu daitezen.

Rio Grande LNG proiektuak AMPOren presentzia are gehiago indartzen du Ipar Amerikako GNL merkatuan, eta agerian uzten du konpainiak mundu mailako erreferentzia diren energia-azpiegituretarako balbula-hornidura handiko kontratuak arrakastaz gauzatzeko duen gaitasuna. Gaur egun, AMPOren balbulak Estatu Batuetako GNL esportaziorako terminal gehienetan daude instalatuta, operadore nagusiek eta ingeniaritza-enpresek konpainiaren teknologian, fidagarritasunean eta fabrikazio-gaitasunean duten konfiantzaren erakusgarri. Erabat integratutako fabrikazio-ereduari eta aplikazio kriogenikoetan nahiz zerbitzu zorrotzetan duen esperientzia zabalari esker, AMPOk mundu osoan energia-soluzio fidagarri eta karbono-emisio baxuko soluzioen garapenean laguntzen jarraitzen du.

Proiektu honek, gainera, AMPOren posizioa sendotzen du GNL industriarako balbula kriogenikoen eta zerbitzu zorrotzerako balbulen hornitzaile nagusietako bat den aldetik. Operadore eta ingeniaritza-enpresa nagusiekin lankidetza estuan, AMPOk balio teknologiko handiko balbula-soluzioak eskaintzen jarraitzen du, munduko energia-aplikaziorik zorrotzenetako batzuetan errendimendu, segurtasun eta fidagarritasun estandar gorenei erantzunez.