QATARREKO NORTH FIELD PRODUCTION SUSTAINABILITY (NFPS) OFFSHORE PROIEKTURAKO HIPPS BOLADUN BALBULAK HORNITU DITU AMPOK

Duela hainbat hilabete balio teknologiko handiko HIPPS boladun balbula multzo bat hornitu zuen AMPOk NFE-North Field Production Sustainability (NFPS) offshore proiekturako. Qatarreko kosta parean dagoen eta North Field eremuan garatzen ari den gas-ekoizpeneko proiektu estrategiko honek herrialdearen gas-ekoizpen gaitasunaren epe luzerako jasangarritasuna eta hedapena bermatzeko helburua du. Garapen offshore estrategiko honen baitan, QatarEnergy eta Saipem-ek AMPO aukeratu zuten segurtasun-aplikazio kritiko baterako balbula-soluzio garrantzitsuak hornitzeko.

Proiektu honek 14×12” tamainako eta 2500 klaseko lau HIPPS balbula barne hartu zituen, eragingailu pneumatikoz hornituak. Top entry motako on-off boladun balbula hauek 0,5 segundoko itxiera-denbora ultra-azkarra dute; AMPOko ingeniaritza-taldeak garatutako soluzio honek segurtasun, osotasun eta erantzun-gaitasun handiena bermatzen du presio handiko inguruneetan. Balbula hauek HIPPS (High Integrity Pressure Protection System) sistemaren parte dira. Honako hau gainpresio egoeretan hoditeriak babesteko diseinatutako segurtasun-sistema erredundantea da, eta kalteak saihesten ditu bai goranzko bai beheranzko hoditerietan.

Proiektuaren fase zorrotzenetako bat HIPPS sistema osoaren kualifikazioa izan zen. Prozesu horren barruan, iFAT (Integrated Factory Acceptance Test) proba integrala arrakastaz egin zen AMPOk Idiazabalen dituen instalazioetan, azken erabiltzailearen aurrean, HIPPS sistema osoaren integrazio zuzena eta errendimendua egiaztatuz. AMPOk hornitutako balbulez gain, proba hauek presio-sentsoreak, eragingailuen kontrol-panelak, PLC kontrol-kabinete bat eta funtzionamendu-moduak aldatzeko kolektore mekaniko bat hartu zituzten barne. Horrek erakusten du AMPOk bere instalazioetan bertan saiakuntza- eta kualifikazio-prozesu konplexuak kudeatzeko duen gaitasuna.

Proiektu honek, halaber, AMPOren gaitasun teknologiko sendoak agerian uzten ditu bere Integrated Smart Solutions (ISS) taldearen bidez. Arlo horretan, enpresak esperientzia zabala garatu du sistema osoen diseinuan, fabrikazioan eta integrazioan. Balio teknologiko handiko balbulak fabrikatzeaz harago, AMPOk segurtasun-sistema konplexuetan hainbat osagairen integrazioa ahalbidetzeko beharrezkoa den ezagutza teknikoa eskaintzen du, HIPPS aplikazio zorrotzetarako eta integrazio-soluzio adimendunetarako konfiantzazko partner gisa duen posizioa sendotuz.

Zerbitzu-baldintza zorrotzetarako fidagarritasun osoko boladun balbulen hornikuntzan duen esperientzia eta ibilbide frogatuagatik aukeratu zuen bezeroak AMPO, baita ingeniaritza nahiz sistemaren integratzailearekin teknikoki konplexuak diren proiektuetan lankidetza estuan aritzeko duen gaitasunagatik ere.
Proiektu honek, gainera, AMPOren posizioa indartzen du offshore aplikazio kritikoetarako partner fidagarri gisa, energia-sektoreko eragile nagusiei balio teknologiko handiko balbula-soluzioak eskainiz munduko upstream proiekturik zorrotzenetako batzuetan.