AMPO ARABIAK BERE HISTORIAKO ESKAERARIK HANDIENA SINATU DU C.A.T. GROUP INGENIARITZAREKIN, ARAMCOREN ZULUF IZENEKO GARAPEN PROIEKTURAKO

AMPOk bere Saudi Arabiako lantegian ekoizteko orain arte jasotako eskaerarik handiena sinatu berri du. Akordio honen bidez, konpainiak tokian bertan fabrikatuko ditu balio teknologiko handiko 1.200 balbula, Saudi Arabiako Dammam industria hirian dituen instalazioetan.

Akordio historiko hau Ekialde Ertainean presentzia zabala duen C.A.T. Group nazioarteko ingeniaritza enpresarekin sinatu da. Bezero honek Arabia Saudiko azpiegitura energetikoen garapen-proiektu garrantzitsuenetariko batzuetan parte hartu izan du. Akordio honen bidez, C.A.T. Group-ek AMPO Arabiaren esku utziko du balio teknologiko handiko 1.200 balbulen tokiko hornikuntza, Aramcoren Zuluf garapen-proiektu estrategikorako. AMPO Arabiak benetan eskertzen du bezeroak bere tokiko fabrikazio-gaitasunetan jarri berri duen konfiantza. Sinadura-ekitaldiak bi erakundeetako ordezkari garrantzitsuenak bildu zituen, besteak beste; C.A.T. Group-en aldetik, Ricardos Najm jauna, Zuzendari Nagusia, eta Giorge Mitri jauna, Saudi Arabiako Erosketa eta Hornikuntza Katearen zuzendaria, eta AMPO Arabiaren aldetik, Salah Elkadiki jauna, AMPO Arabiako Zuzendari Nagusia, Karthik Ramaraj jauna, AMPOren Ekialde Hurbileko Salmenta zuzendaria, eta baita AMPO Arabiako tokiko zuzendaritza-taldeko kideak ere.

Golfo Arabiarreko itsas petrolio-hobirik handienetako bat da Zuluf, Arabia Saudiko ipar-ekialdeko kostatik 40 kilometrotara kokatua dagoena. Aramcok ekoizpen-ahalmena areagotu eta erresumaren burujabetza energetikoa indartzeko, egun martxan duen offshore ekimen garrantzitsuenetarikoa da Zuluf garapen-programa, prozesatze-instalazioak, plataformak eta lotutako azpiegiturak zabalduz ekoizpena nabarmen handitzea helburu duena. Proiektu honetarako beharrezkoak diren balbulak AMPO Arabian ekoizteak agerian uzten du bai Aramco eta bai herrialdearentzat estrategikoak diren proiektuetan kooperatibak egiten duen ekarpena.

Eskaera garrantzitsu honek Aramcoren IKTVA programaren barruan mugarri esanguratsua suposatuko du gainera, AMPO Arabiak tokiko fabrikazioari eta industria-dibertsifikazioari begira herrialdearen Vision 2030 estrategiarekin duen konpromisoa indartuz. Modu horretan AMPOk industria-oinarri sendo bat eraikitzen lagunduko dio herrialdeari.