AMPOREN AXIAL MOTAKO ERRETENTZIO BALBULAK BRASILGO P-84 ETA P-85 FPSO PLATAFORMETAN INSTALATU DIRA

AMPOk arrakastaz hornitu ditu balio teknologiko altuko axial motako hainbat erretentzio balbula Brasilgo kostaldean kokatutako bi FPSO proiektu garrantzitsuetarako: P-84 (Atapu) eta P-85 (Sépia) plataforma flotatzaileetarako. Instalazio hauek Atapu eta Sépia eremuetan Petrobras enpresa exekutatzen ari den offshore garapenaren parte dira. Plataforma bakoitzak eguneko 225.000 upel petrolio ekoizteko ahalmena eta 10 milioi metro kubiko gas prozesatzeko gaitasuna izango du.

20 hazbeteko fluxu axialeko zortzi erretentzio balbulak, 150# klasekoak eta Duplex materialean fabrikatuak, ponpa kritikoen alboan instalatu dira. Haien funtzio nagusia hoditerian sortzen den kontrapresioaren aurrean ponpak babestea da, itsas ingurune zorrotzetan segurtasun operatiboa eta fidagarritasuna bermatuz. Balbula guztiak ABS erakundeak ziurtatu ditu, offshore sektoreko estandar zorrotzak betez.

FRAMO (Norbegia), aurrez bere ponpentzako fundizio osagaiak hornitu izan dizkiogun bezero historikoa, izan da proiektu honetako bezeroa. Balbulen zehaztapenak bezeroak berak definitu bazituen ere, bi enpresen arteko lankidetza-ibilbide sendoak FRAMOk AMPO POYAM VALVES balbula-hornitzaile alternatibo gisa hautatzea ekarri du proiektu honetan.

Hornikuntza hauek indartu egiten dute AMPOk energia-sektorerako balio teknologiko handiko balbula-soluzioen garapenean eta hornikuntzan duen ibilbidea, bereziki eskakizun zorrotzeko offshore aplikazioetan. Duplex materialaren erabilerak iraunkortasun handia eta korrosioarekiko erresistentzia bermatzen ditu itsas inguruneetan, eta agerian uzten du AMPOk zehaztasun teknikoa, materialen bikaintasuna eta fidagarritasun frogatua uztartzen dituzten ingeniaritza-soluzio iraunkorrekin duen konpromisoa.